Бүгінде Мемлекет басшысы жариялаған «Баршаға арналған қазіргі заманғы мемлекет – 100 нақты қадам» Ұлт жоспарының «Заң үстемдігін қамтамасыз ету» деп аталатын екінші бағыты бойынша еліміздің сот жүйесінде бірқатар өзгерістер болады деп күтілуде. Соның ішіндегі ең маңызды өзгерістердің бірі – қазіргі бес сатылы сот жүйесінен (бірінші, апелляциялық, кассациялық, қадағалау және қайта қадағалау) үш сатылы (бірінші, апелляциялық, кассациялық) сот төрелігі жүйесіне көшу болып отыр. Бірақ, ондай өзгерістен халық не ұтады? Бәрінен бұрын мұндай өзгерістер сот саласына қаратыла жиі айтылатын сыбайлас жемқорлықтан, судьялардың біліксіздігі мен дауды арттырудан арылта ала ма? Әлде «баяғы жартас – бір жартас» күйінде қала бере ме? Міне, осы тақылеттес халық көкейінде жүрген сауалдарға сай және сот жүйесіндегі басқа да өзгерістер жайында толығырақ білу мақсатында Жоғарғы Соттың қылмыстық істер жөніндегі қадағалаушы сот алқасының төрағасы Абай Рахметулиннен біраз сұрақтарымызға жауап алдық.
– Абай Жамбылұлы, сот саласына қатысты Елбасы жариялаған қадамдардың ең алғашқысы әрі маңыздысы сот жүйесі сатыларын оңтайландыру болып табылады. Турасын айтсақ, осы бес сатылы сот жүйесінен үш сатылы жүйеге көшудің мәні неде және бұл қандай қажеттіліктен туындап отыр?
– Үш сатылы сот жүйесі – халықаралық тәжірибеде бар үрдіс. Әлемдегі сот тәжірибесі көрсеткендей, аралық сатылардың көп болуы сот процестерін қасақана ұзартуға және сот шешімін сөзбұйдаға салуға ықпал етеді. Сот шешімінің бірнеше рет өзгеріп, күшін жоюы – республика атынан шешім қабылдайтын соттардың беделіне нұқсан келтіретін факторлардың бірі. Себебі, апелляциялық және кассациялық сатылардың бір облыстық сотта шоғырлануы сот істерін қараудың созылып кетіп, шешім қабылдаудың қиындауына негіз болуда. Бұған қоса, кассациялық алқа іс жүзінде Жоғарғы Сотқа жүктелген қадағалау сатысының қызметін атқарып, күшіне енген сот шешімінің қайта-қайта өзгеріске ұшырауына алып келуде. Кеңестік кезеңнен қалған бұл жүйе бүгінгі күннің талабымен үйлеспей, азаматтардың құқықтары мен бостандықтарын, адамның, қоғамның және мемлекеттің заңды мүддесін неғұрлым жедел әрі сапалы қорғауға өзінің кері әсерін тигізуде.
Міне, осындай мәселелерді ескере келе, Жаңғырту жөніндегі ұлттық комиссия сот жүйесінің сатыларын оңтайландыру туралы бастаманы қолдап отыр. Енді келесі жылдың басынан бастап бірінші саты – аудандық соттар, апелляциялық саты – облыстық соттар, кассациялық саты – Жоғарғы Сот болады деген шешім қабылданып отыр. Бұл шешімді Мемлекет басшысы да мақұлдап отыр. Еліміздің Конституциясына және «Қазақстан Республикасының сот жүйесі мен судьяларының мәртебесі туралы» Конституциялық заңға, сондай-ақ, кейбір заңдарға тиісті өзгерістер енгізгеннен кейін сот жүйесі жаңа үлгіде жұмыс істейтін болады.
– Енді сот жүйесі жаңа үлгіде жұмыс істеп, ел, халық болып күтіп жүргеніміздей, әділ шешім шығаруда судьялардың жауапкершілігі артады дейсіз ғой. Сонымен қатар, сот сатыларының азаюы Жоғарғы Сот судьяларының жүктемесінің артуына әкеліп соғады емес пе?
– Әрине, бұл жауапкершіліктің айтарлықтай артуына ықпал етеді. Жүктеме де арта түседі. Өйткені, бүгінгі таңда облыстық соттардың кассациялық алқалары жылына 24-25 мың істі қараса, келешекте бұл істер Жоғарғы Соттың қарауына келіп түсуі мүмкін. Мұның сыртында, Жоғарғы Сот республикадағы сот тәжірибесінің бірізділігін сақтау мақсатында нормативтік қаулылар қабылдай отырып, нормашығармашылық қызметті жүзеге асырады. Сонымен қатар, Ұлт жоспарының 23-қадамында инвестициялық даулар бойынша жеке сот істерін жүргізуді құру, Жоғарғы Сотта ірі инвесторлар қатысатын дау-ларды қарау үшін Инвестициялық алқаны ұйымдастыру көзделген. Міне, осындай ауқымды міндеттерді іске асыру үшін Жоғарғы Сот судьялары мен оған тиесілі аппарат қызметкерлерінің санын арттыру көзделіп отыр.
– Сот сатыларының азаюынан не ұтамыз? Дау көп кезде халыққа қажеттісі сапа ғой. Нақтырақ айтсаңыз.
– Сот сатыларының азаюы апелляциялық сатының рөлін күшейтуге мұрындық болмақ. Алдағы уақытта апелляциялық саты істерді үш судьядан тұратын алқа негізінде қарайтын болады. Осы орайда, барлық істер бірдей судьялардың алқалық тәртібімен қаралады деуге болмайды. Мәселен, қысқартылған тәртіптегі, қылмыстық теріс қылық бойынша, онша ауыр емес қылмыстар және сот үкімін орындау мәселелеріне қатысты істерді судьялар бұрынғысынша жеке қарай беретін болады. Ал қалған қылмыстық істер міндетті түрде судьялардың алқалық құрамымен қаралатын болады.
Азаматтық істерге келетін болсақ, жеңілдетілген және бұйрық арқылы іс жүргізу нысанындағы істер апелляциялық сатыда өзінің нақты шешімін табуы керек. Осылай ету арқылы сот сатыларының маңыздылығы мен мәртебесі артатын болады. Мұндағы мақсат – азаматтарды әуре-сарсаңға салмай, сот сатыларын мейлінше азайту, сот төрелігіне қолжетімділікті арттыру, іс бойынша сот шешімінің жедел қабылданып, сот әділдігін орнату. Бір сөзбен айтқанда, сот сатыларын оңтайландыру, өзіңіз айтқандай, сот төрелігінің сапасын арттырудың басты жолы болып табылады.
– Осыған орай, Жоғарғы Сотта да істерді қараудың тәртібі, амалы өзгеретін шығар?
– Әрине, Жоғарғы Сотта істерді қараудың жаңа тәртібі, шағымдар мен өтініштерді алдын ала қарау жүйесі әзірленді. Себебі, қаралуға тиіс істер санаты мен түрлері бойынша шектеу қойылмаса, Жоғарғы Сотқа жоғары жүктемені атқару оңайға соқпасы анық. Мәселен, онша ауыр емес қылмыстық істерді кассацияда қарауға шектеу қойылу көзделуде. Сонымен қатар, қылмыстық теріс қылықпен байланысты және әкімшілік істер кассациялық сатыға прокуратура арқылы келіп түсуі тиіс. –
Болашақ судьяларды іріктеу жүйесін қайта қарау қажеттігін Елбасы текке айтпағаны белгілі. Өйткені, сіз айтқан сот жүйесіне енгізіліп жатқан өзгерістердің нәтижелі болуы, ең алдымен, судьялардың кәсіби біліктілігіне тікелей байланысты ғой. Халыққа заңды жетік білетін, заң үстемдігін әрқашан жоғары қоятын, қара қылды қақ жаратын судьялар керек. Осы бағытта қандай шаралар қолға алынуда?
– Иә, орын алатын өзгерістерді сөз етпес бұрын судьялыққа үміткерлерді іріктеудің қолданыстағы жүйесі туралы айта кеткен жөн. Елімізде 2001 жылдан бастап жариялы және көпсатылы сипатқа ие конкурстық іріктеу жүйесі енгізілді. Судьялар біліктілік емтиханының қорытындысы бойынша немесе Президент жанындағы Мемлекеттік басқару академиясына қарасты Сот төрелігі институтындағы оқудың қорытындысы бойынша іріктеуден өтеді. Үміткерлердің кандидатурасын құрамына жергілікті жұртшылық, үкіметтік емес ұйымдардың өкілдері кіретін өңірлердегі Қоғамдық кеңес жариялы түрде талқылайды. Кейіннен олардың кандидатуралары Жоғары Сот Кеңесінде қарастырылады.
Заман талабына сәйкес, сот корпусына қойылатын талап та тұрақты түрде артуда. Қазіргі таңда еліміз қарқынды дамуда, қоғамдық қатынастардың, әлеуметтік-экономикалық процестердің ауқымы кеңеюде. Қазақстанды әлемдегі дамыған 30 елдің қатарына енгізу міндетін орындау көзделуде. Сондықтан да соттар мен судьялардың ең жоғарғы талаптарға сай келуі уақыт талабынан туындаған міндет болып табылады. Бұл орайда, Жоғарғы Сот судьялыққа үміткерлерге қойылатын біліктілік талаптарын қайта қарау бойынша бірқатар ұсыныстарды әзірледі. Ұлттық комиссия судьялыққа үміткерлердің жасын 30 жасқа дейін өсіру және олардың сот саласына тікелей қатысты бес жылдық жұмыс өтілін енгізу жөніндегі ұсыныстарды қолдады. Атап айтқанда, болашақта барлық судьялар міндетті түрде Сот төрелігі институтының магистратурасында даярлықтан өтуі тиіс. Аталған институт Президент жанындағы Мемлекеттік басқару академиясының құрамынан шығарылып, Жоғарғы Соттың құзырына берілетін болды. Онда оқитын магистранттар мен судьялыққа үміткерлер үшін тағылымдама мерзімін бір жылға дейін арттыру көзделуде. Бұған қоса, судьялыққа үміткерлердің біліктілік емтиханын тапсыру тәртібі қайта қаралып, судьялық лауазымға ұсынылған тұлғалар үшін бір жылдық сынақ мерзімін енгізу көзделуде.
Аудандық сот судьясының лауазымдық жалақысының 70 пайызы көлеміндегі еңбекақысын төлей отырып, босатылған негізде судьялардың тағылымдамадан өту жүйесін енгізу мәселесі қарастырылуда. Міне, қарастырылып отырған осы шаралардың барлығы сот корпусын кәсіби білікті судьялармен толықтыруға және сот жүйесін дамыту мақсатында қолға алынып отыр. –
Ұлт жоспарының 22-қадамына сәйкес, адамның және азаматтардың конституциялық құқын шектейтін барлық тергеу қызметі жөніндегі өкілеттілікті тергеу судьясына біртіндеп беруді қамтамасыз ету арқылы сотта айыпталушы және қорғаушы арасындағы теңгерімді қамтамасыз ету көзделген. Осыны нақтырақ, ара-жігін ажыратып айтып берсеңіз.
– Жалпы, бұл бағыттағы жұмыстар 2010 жылдан 2020 жылға дейінгі кезеңге арналған Құқықтық саясат тұжырымдамасында қарастырылған болатын. Өзіңіз білетіндей, еліміздің қылмыстық заңнамасы жаңарып, 2015 жылдың 1 қаңтарынан бастап төрт бірдей кодекс күшіне енді. Жаңа кодекстер бірқатар өзгерістерді қамтиды. Атап айтқанда, жаңа Қылмыстық кодекске қылмыстық теріс қылық, іс жүргізу келісімінің шарттарын орындаған жағдайда қылмыстық жауапкершіліктен босату және тағы басқа бірқатар жаңа ұғымдар енгізілді. Бұл өзгерістер сотталғандардың санын азайту жұмысын неғұрлым тиімді жүргізуге мүмкіндік беретінін айта кеткен жөн. Қылмыстық іс жүргізу кодексіндегі қылмыстық процестің бастапқы сатысындағы тергеуге дейінгі тексеру сатысының алынып тасталуы азаматтардың конституциялық құқықтарын сақтауға және көптеген іс-шаралар жүргізбей-ақ қылмыстық істі қозғауға мүмкіндік береді.
Сотқа дейінгі тергеу ұғымы енгізілді, азаматтарды ұстаудың тәртібі регламенттелді және іс жүзінде ұстау ұғымының мән-мазмұны нақтыланды. Бұдан былай адамды ұстау барысында оның құқықтары мен міндеттері түсіндірілетін болады. Тергеу барысында істі жедел жүргізу, кінәні мойындау туралы және ынтымақтастық туралы келісімдердің енгізілуі іс жүргізу шешімдерін қабылдау тәртібін жеңілдетуге мүмкіндік береді. Сотқа дейінгі іс жүргізу барысында сот бақылауын жүзеге асыратын тергеу судьясы, қорғалу құқығына ие куәгер, прокуратура органы басшысының құзыретіне ие процесс прокуроры секілді жаңа лауазым түрлері енгізілді.
Енді сот жүйесіне тың жаңалық алып келген ұғымның бірі, өзіңіз айтқандай, тергеу судьясы. Тергеу судьясы қылмыстық істі жүргізудегі жаңа субъект ретінде істі сотқа дейін жүргізу барысында азаматтардың Конституциялық құқықтары мен бостандықтарын қорғауға бағытталған қызметті жүзеге асырады. Қылмыстық-процестік кодекске сәйкес, тергеу судьясы – сотқа дейінгі іс жүргізу барысында осы Кодексте көзделген өкілеттіктерді жүзеге асыратын бірінші сатыдағы сот судьясы. Аталған кодекстің 55-бабында тергеу судьясының өкілеттіктері нақты белгіленген.
Тергеу судьясының өкілеттілігіне күзетпен ұстауды, үйқамақты, лаузымнан уақытша шеттетуді, жақындауға тыйым салуды, экстрадициялық қамақты, күзетпен ұстау, үйқамақ, экстрадициялық қамақ мерзімдерін ұзарту, кепілді қолдану, мүлікке тыйым салуды санкциялау және күзетпен ұсталмайтын адамды сот-психиатриялық немесе сот-медициналық сараптама жүргізу үшін медициналық ұйымға мәжбүрлеп орналастыру, бұрын өзіне қатысты күзетпен ұстау қолданылған адамның психикалық ауру фактісі анықталған кезде, оны ауруларды қатаң оқшаулау жағдайында ұстауға лайықталған, психиатриялық көмек көрсететін арнаулы медициналық ұйымға ауыстыру, мәйітті эксгумациялау, күдіктіге, айыпталушыға халықаралық іздеу жариялау мәселері жатады. Сонымен қатар, тергеу судьясының құзыретіне Қылмыстық-процестік кодекстің 55-бабының 2-бөлігіне сәйкес қосымша өкілеттіктер берілген. Қазіргі таңда тергеу судьялары 8 әрекетке санкция бере алатын болса, болашақта мұндай санкциялардың қатары қарауға, тінтуге, жеке тінту жүргізуге, алуға берілетін санкциялармен толығады деп күтілуде.
– Демек, Ұлт жоспарында көзделген барлық құқықтық шаралар сотқа дейінгі тергеу-тексеру қызметінің сапасын жақсартуға, азаматтардың құқықтары мен бостандықтарының сапалы қорғалуына енді мүмкіндік береді деп сенім артуға әбден болады дейсіз ғой.
– Иә, солай.
– Әңгімеңізге рахмет.
Ұқсас мәліметтер
- Оңтүстік Қазақстан облыстық сотының азаматтық және әкімшілік істер жөніндегі апелляциялық сот алқасының төрағасы Мадияр Балкенің сұхбаты «Халықаралық арбитражды орталық құрудың келешегі зор» // «Егемен Қазақстан», 2015 жылғы 15 тамыз
- Маңғыстау облысының кәмелетке толмағандардың істері жөніндегі мамандандырылған ауданаралық сотының төрағасы А.Тленов "Кәмелетке толмағандардың құқықтары туралы" // "http://www.mangmedia" 2015 жылғы 8 шілде