Өмір өз талабын әр кезеңде қойып отырады.
Қазіргі жаһандану уақытында экономикалық байланыстардың нығаюы, дамушы елдер мен нарықтық қатынастар арасында бәсекелестіктің өсуі ұлттық экономикаға инвестициялық тартымдылықты арттыру мәселесін жаңғырту қажеттігін көрсетіп отыр.
Халықаралық сауда-экономикалық байланыстардың дамуы, әлемдік экономикадағы ықпалдастық үдерістері бізден жаңа көзқарастар мен оңтайлы тәсілдерді талап етуде. Соның ішінде, сот әділдігін тиімді жүргізу мәселелері де бар. Өйткені қазақстандық сот жүйесі жалпы әлемдік үдерістен тыс қала алмайды. Сондықтан бірінші кезекте инвестицияларды қорғау тұрғысындағы заңнаманы және сот жүйесін жетілдіру мәселелеріне баса маңыз беріліп отыр.
«Әділ сот төрелігі инвесторлар мен бизнес үшін қолжетімді болмақ. Жекеменшік құқығы мызғымайтын болады. Инвестициялық сот және халықаралық төрелік сот орталығы үздік халықаралық тәжірибенің үлгісі бойынша елдегі бизнес ахуалды әлемдегі ең тартымдылардың бірі етуі тиіс» деп елімізде инвестициялық климатты жақсарту мақсатын Елбасы Н.Ә.Назарбаев айқындады.
Мұнымен қатар, мемлекет басшысының «100 нақты қадам – баршаға арналған қазіргі заманғы мемлекет» атты Ұлт жоспарының 23-қадамында инвестициялық даулар бойынша жеке сот істерін жүргізуді құруды, Жоғарғы сотта ірі инвесторлар қатысатын дауларды қарау үшін Инвестициялық алқаны ұйымдастыруды тапсырды.
Елбасының заңның үстемдігін қамтамасыз ету жөнінде Ұлт жоспарындағы осы тапсырмасын іске асыруға байланысты тағы бір өрелі іс өмірге жолдама алуға дайын. Атап айтқанда, инвестициялық ахуалды жақсарту мақсатында және соттарға деген сенімді одан сайын арттыру үшін Астана қалалық сотында инвестициялық дауларды қарайтын сот құрамын құру қарастырылуда.
Бұл жүйенің басты ерекшелігі, сот процестері қысқа мерзімде, барынша жеңілдетілген жағдайда жүргізілмек. Инвестициялық даулардың сапалы қаралуы судьялардан бірқатар тиісті салалар мен құқықтық институттарға арнайы бейімделген білімділікті, жалпы алғанда, дауларды шешуде неғұрлым практикалық тұрғыда машықтануды талап етеді.
Инвесторлардың қатысуымен қаралатын даулардың санатына салықтық, кедендік, жер қойнауын пайдалану, қоршаған ортаны, зияткерлік меншікті, бәсекелестікті және табиғи монополияларды қорғау, тағы басқа да даулар жатқызылатын болады.
Сот жүйесінің алдында тұрған өзекті мәселер: кәсіпкерлік субъектілері қатысатын сот істерінің қаралуын жеделдету, сот өндірісін жеңілдету, төрешілдік ресімдерді азайту сұрақтары да қарастырылуда.
Елбасы алға қойған жаңа міндеттерді жүзеге асыру барысында бұл салада Жоғарғы сот тарапынан бірқатар игілікті шаралар: ең озық инвестициялық соттар жұмыс істейтін шетел тәжірибесін оқып-үйрену, оны қолдану практикасын зерделеу, инвесторлар қатысатын салалардағы дауларды зерттеу жүргізіліп жатыр.
Биылғы ақпан айында Жоғарғы соттың ұйымдастырған «Әділ сот жүйесі және орнықты заңнама – тартымды инвестициялық климаттың кепілі» атты халықаралық дөңгелек үстел барысында осы мәселе кеңінен талқыланды. Іс-шара мұнай-газ саласының қазақстандық заңгерлер қауымдастығы, КАZВАR коммерциялық заңгерлер алқасымен бірлесіп ұйымдастырылды. Оған Үкімет, Конституциялық Кеңес мүшелері, судьялар, Парламент депутаттары, мемлекеттік органдар және үкіметтік емес ұйымдар, дипломатиялық корпустың өкілдері кеңінен қатысты.
Президент жанындағы Шетел инвесторлары кеңесінің құрамындағы «АрселорМитталТемиртау», «Би Джи Групп», «Камеко», «Эксон Мобил», «Тенгизшевройл», «Шеврон», «Норт Каспиан Оперейтинг Компани», т.б. ірі компаниялардың өкілдері шақырылды.
Басқосуда инвесторлардың құқықтарын қорғау, инвестициялық дауларды шешу, инвесторларға арналған салық артықшылықтары, инвестициялар және төрелік туралы заңнаманы жетілдіру жөніндегі өзекті мәселелер жан-жақты талқыланды. Инвесторлардың қатысуымен дауларды қарастыру және шешу тұрғысында сындарлы пікірлер алмасылды.
Елімізде инвестициялық сот құру, оған білікті шетелдік мамандарды тарту қажеттілігі жайлы Елбасы «Нұр Отан» партиясының XVI съезінде: «Шетелдік және отандық инвесторлар қазақстандық әділ соттың адалдығына сенімді болуы тиіс. Оған деген сенімді арттыру үшін инвестициялық дауларды қарауға шетелдік судьяларды тартып, мұндай дауларды шетелдік және халықаралық соттардың үздік стандарттары бойынша қарау қажет» деп тапсырған болатын.
Осы тапсырмаларды орындау мақсатында Жоғарғы сот пен Ұлттық банктің бірлескен делегациясы Біріккен Араб Әмірліктеріне және Сингапур Республикасына жұмыс сапарымен барды. Осы сапар барысында инвестициялық дауларды шешудің және қаржы орталықтарын дамытудың озық шетелдік тәжірибесі зерделенді.
БАӘ-нің Жоғарғы соты мен Дубай халықаралық қаржы орталығындағы ресми кездесу барысында соттар арасындағы ынтымақтастық туралы ресми хаттамаға қол қойылды. Сөйтіп, осындай құрылымдар құрылған кезде консультациялық көмек көрсету туралы уағдаластыққа қол жеткізілді.
Сингапурда өткен басқосуда сот ісін жүргізу, инвестициялық даулар саласын реформалау, судьялардың кәсіби деңгейін арттыру және соттарды ақпараттармен қамтамасыз етудің мән-жайы кеңінен талқыланды.
Дубай халықаралық қаржы орталығы мен Сингапур қолданған тәжірибеден қаржы аумағын басқарудың жаңа әкімшілік тәсілдерін енгізу, төрешілдік рәсімдерді жою, салық салу, кеден саласында инвесторларға жеңілдіктер беру, қаржылық орталық аумағында шетел бизнесі үшін жұртшылық таныған жалпы құқық (англо-саксондық) жүйесін енгізудің тәсілдерін қолдану қажеттілігі туындап отыр.
Азаматтық іс жүргізу кодексінің жобасында инвесторлар мен мемлекеттік органдар арасындағы инвестициялық қызметке байланысты дауларды қараудың жаңа тәртібі көзделген. Соған сәйкес, инвестициялық дауларды Астана қалалық соты бірінші сатыдағы сот ретінде қарастыру қажеттілігі ұсынылды.
Жоғарғы сотта мамандандырылған алқа құрылып, инвестициялық даулар бойынша Астана қалалық сотында қаралған істерді апелляциялық тәртіппен, ал өте ірі инвесторлық дауларды бірінші саты соты ретінде қарайтын болады. Осылайша, мамандандырылған құрамдағы судьялар үшін инвестициялық істер бойынша сатылар санын қысқартуға және істерді қарау сапасын жақсартуға жағдай жасалады.
Жалпы алғанда, ұсынылып отырған тәсілдер осы саладағы дауларды неғұрлым жоғары деңгейде шешуге септігін тигізіп, жергілікті билік органдарының сот процесіне сырттан араласуына жол бермейді.
Ұқсас мәліметтер
- Жұбатов Талғат Жайлаубаевич, Түрксіб аудандық сотының кеңсе меңгерушісі,// "СОТ ЖҮЙЕСІНІҢ НЕГІЗГІ ҰСТАНЫМЫ- АЗАМАТТЫҢ ТҮЗЕУІНЕ МҮМКІНДІК БЕРУ" //"Заң газеті",// "23.12.2015жыл"
- ҚР Жоғарғы Сотының судьясы, Жоғары Сот Кеңесінің мүшесі Д. Нұралин «Қылмыстың жаңа түрлерінің көбеюі судьялардың үздіксіз өз біліктілігін арттырумен айналысуын талап етеді» / «ҚазАқпарат», 2015 жылғы 8 желтоқсан
- Бердыбеков Азамат Өмірбекұлы, Алматы қалалық сотының кеңсе басшысының орынбасары ,// "Ана Тілі №46(1304)",//"19-25. 11.2015жыл.